நாட்டில் மீண்டும் தேசியமட்டத் தேர்தல்கள் தொடர்பான தகவல்களும் ஊகங்களும்
வெளிவர ஆரம்பித்துவிட்டன. தற்போதைய நிலைமையில் முதலில் பாராளுமன்றத் தேர்தல் நடைபெறுமா? அல்லது ஜனாதிபதித் தேர்தல் நடைபெறுமா? என்ற கேள்விகள் எழுப்பப்பட்டுவருவதுடன் அதற்கான ஆரம்பகட்ட தயார் நடவடிக்கைகளுக்கு அரசியல் கட்சிகள் தற்போதிருந்தே காய் நகர்த்தலை ஆரம்பித்துள்ளதையும் அவதானிக்க முடிகின்றது.
தற்போதைய நிலைமையில் அரசாங்கத்தின் தயார் நிலைகளை பார்க்கும்போது ஊவா மாகாண சபைத் தேர்தலுக்கு முக்கியத்துவம் அளித்துள்ளமை தெரிகின்றது. ஆனால் ஊவா மாகாண சபைத் தேர்தலின் பின்னர் நடைபெறப்போவது பாராளுமன்றத் தேர்தலா? அல்லது ஜனாதிபதி தேர்தலா? என்பதே தீர்மானம் எடுக்கப்படாத விடயமாக உள்ளது. அல்லது தீர்மானம் எடுக்கப்பட்டு வெளியிடப்படாத விடயமாகவும் இது இருக்கலாம். இந்நிலையில் அரசியல் கட்சிகள் ஜனாதிபதி மற்றும் பாராளுமன்றத் தேர்தல்களுக்கான ஆயத்தங்களில் துரித காய் நகர்த்தலில் ஈடுபட்டுள்ளன.
ஜனாதிபதித் தேர்தல் விடயம் பேசப்படுகின்ற நிலையில் பொதுவேட்பாளர் விவகாரமும் வெளியில் வந்துள்ளது. பொது வேட்பாளர் பட்டியல் தற்போதைய நிலைமையில் நீண்டுகொண்டே செல்கின்றமையை அவதானிக்க முடிகின்றது.
எதிர்வரும் 2015 ஆம் ஆண்டின் ஆரம்பத்தில் ஏதாவதொரு தேசியக் தேர்தல் நிச்சயம் நடக்கும் என்பதனை பிரதான எதிர்க்கட்சியான ஐக்கிய தேசிய கட்சி ஆருடம் கூறிவருகின்றது. அந்தவகையில் எந்தவொரு தேசிய மட்டத் தேர்தலாவது 2015 ஆம் ஆண்டின் ஆரம்பத்தில் நடக்கலாம் என்ற எடுகோளின் அடிப்படையிலேயே பிரதான அரசியல் கட்சிகளின் அரசியல் நகர்வுகள் இடம்பெற்றுவருகின்றன.
இறுதியாக நாட்டில் ஜனாதிபதித் தேர்தல் 2010 ஆம் ஆண்டு ஜனவரி மாதம் 26 ஆம் திகதி நடைபெற்றது. எனினும் ஜனாதிபதி 2010 ஆம் ஆண்டு நவம்பர் மாதமே இரண்டாம் பதவிக் காலத்துக்காக பதவியேற்றிருந்தார். அந்தவகையில் ஜனாதிபதித் தேர்தலை நடத்துவதற்கு 2016 ஆம் ஆண்டு இறுதிப் பகுதிவரை அரசியலமைப்பின் பிரகாரம் கால அவகாசம் இருக்கின்றது. அதேவேளை பாராளுமன்றத் தேர்தலை பொறுத்தமட்டில் 2010 ஆம் ஆண்டு ஏப்ரல் மாதம் நடைபெற்றது. எனவே அடுத்த பாராளுமன்றத் தேர்தலை நடத்துவதற்கு எதிர்வரும் 2016 ஆம் ஆண்டு வரை கால அவகாசம் அரசியலமைப்பின்படி இருக்கின்றது.
கடந்த 2010 ஆம் ஆண்டு நடைபெற்ற பாராளுமன்றத் தேர்தலில் ஆளும் ஐக்கிய மக்கள் சுதந்திர முன்னணி 127 ஆசனங்களையும் தேசியப் பட்டியல் மூலம் 17 ஆசனங்களையும் பெற்று மொத்தமாக 144 பிரதிநிதிகளை பெற்றது. பிரதான எதிர்க்கட்சியான ஐக்கிய தேசியக் கட்சி 51 ஆசனங்களையும் தேசிய பட்டியல் மூலம் 9 ஆசனங்களையும் பெற்று 60 ஆசனங்களை மொத்தமாக பெற்றிருந்தது. தமிழ்த் தேசியக் கூட்டமைப்பு 13 ஆசனங்களையும் தேசியப் பட்டியல் மூலம் 1 ஆசனத்தையும் பெற்று 14 ஆசனங்களை மொத்தமாக பெற்றிருந்தது.
ஜனநாயகக் தேசியக் கூட்டணி 5 ஆசனங்களையும் தேசியப் பட்டியல் மூலம் 2 ஆசனங்களையும் பெற்று 7 பிரதிநிதிகளை பெற்றிருந்தது என்பது குறிப்பிடத்தக்க விடயமாகும். பின்னர் அரசாங்கம் ஆளும் கூட்டணியின் எம்.பி. க்களின் எண்ணிக்கையை 160 ஆக உயர்த்திக்கொண்டது. அந்தவகையில் தற்போது மீண்டும் முதலில் பாராளுமன்றத் தேர்தல் நடைபெறுமாயின் இவ்வாறான தொரு தேர்தல் முடிவு வருமா? அல்லது இதனைவிட வித்தியாசமான முடிவு வருமா என்பது இன்று பலராலும் எழுப்பப்படும் முக்கிய விடயமாக அமைந்துள்ளது.
எனினும் எமது நாட்டைப் பொறுத்தமட்டில் அரசியல் சூழ்நிலை களநிலைவரங்களுக்கு அமையவே தேர்தல்கள் நடத்தப்பட்டுவருகின்றன. தேசிய மட்டத் தேர்தல்கள் எப்போதும் ஆளும் கட்சிக்கு சாதகமான காலப்பகுதியில் நடத்தப்படும் என்பதனை மறுக்க முடியாது. அந்த வகையில் அரசாங்கத்துக்கு தனக்கு சாதகமான காலப்பகுதியில் தேசிய தேர்தல் ஒன்றை நடத்த முற்படும் என்பதனை எதிர்பார்க்கலாம்.
அண்மையில் நடந்து முடிந்த மேல் மற்றும் தென் மாகாண சபைகளுக்கான தேர்தல்களில் ஆளும் ஐக்கிய மக்கள் சுதந்திர முன்னணி குறிப்பிடத்தக்க சரிவை சந்தித்தது என்றே கூறலாம். ஆளும் கட்சி தாங்கள் சரிவை சந்திக்கவில்லை என்றும் கூறினாலும் பெற்றுக்கொண்ட பிரதிநிதிகளின் எண்ணிக்கையை கடந்த 2009 ஆம் ஆண்டு நடைபெற்ற மாகாண சபைத் தேர்தலில் பெற்ற பிரதிநிதிகளுடன் ஒப்பிடுகையில் சரிவு ஏற்பட்டுள்ளமையை புரிந்துகொள்ள முடியும்.
எனவே கடந்த மேல் மற்றும் தென் மாகாண சபைகளில் ஏற்பட்டுள்ள ஓரளவு வீழ்ச்சியானது தேசிய மட்டத் தேர்தல் ஒன்றை விரைவில் நடத்தவேண்டும் என்ற ஒரு தேவையை ஆளும் கட்சிக்கு ஏற்படுத்தியிருக்கலாம்.
அண்மையில் தேசிய பத்திரிகைகளின் ஆசிரியர்களை சந்தித்திருந்த ஜனாதிபதி மஹிந்த ராஜபக் ஷ எதிர்க்கட்சிகள் கோரினால் எந்தவொரு தேர்தலையும் நடத்துவதற்கு தயாராக இருப்பதாக கூறியிருந்தார். அதாவது நாட்டின் எதிர்க்கட்சி கள் கோரினால் எந்தவொரு தேர்தலுக்கும் தயார் என்று ஜனாதிபதி குறிப்பிட்டுள்ளார். தேசிய தேர்தல் ஒன்றுக்கு அரசாங்கம் செல்லவேண்டும் என்று எதிர்க்கட்சிகள் விடுத்த கோரிக்கை குறித்து கருத்து வெளியிடுகையிலேயே ஜனாதிபதி மேற்கண்டவாறு குறிப்பிட்டிருந்தார்.
எனினும் ஆளும் ஐக்கிய மக்கள் சுதந்திர முன்னணியானது அடுத்து உடனடியான முறையில் ஊவா மாகாண சபைத் தேர்தலிலேயே கவனம் செலுத்தியுள்ளதுடன் அதன் பின்னர் தேசிய தேர்தல் ஒன்றை குறி வைத்துள்ளது என்று கூறலாம். அந்தவகையில் ஊவா மாகாண சபைக்கான ஆயத்தங்களில் அனைத்து அரசியல் கட்சிகளும் ஈடுபட்டுவருகின்றன. குறிப்பாக எதிர்வரும் செப்டெம்பர் மாதத்துக்கு முன்னர் ஊவா மாகாண சபைத் தேர்தலை அரசியலமைப்பின் பிரகாரம் நடத்தவேண்டிய தேவை உள்ளதால் அதற்கான ஏற்பாடுகள் இடம்பெற்றுவருகின்றன. ஊவா மாகாண சபைத் தேர்தலுக்குப் பின்னரே எந்தவொரு தேர்தலும் நடைபெறும் என்பதனை இவ்வாரம் தேர்தல்கள் ஆணையாளரும் கட்டியம் கூறியிருந்தார்.
கடந்த திங்கட்கிழமை ஜனாதிபதி மஹிந்த ராஜபக் ஷ சீனாவுக்கு விஜயம் செய்வதற்கு முன்னதாக ஆளும் ஐக்கிய மக்கள் சுதந்திர முன்னணியின் பாராளுமன்ற குழுக்கூட்டத்தை தலைமை தாங்கி நடத்தியிருந்தார். இந்தக் கூட்டத்தின்போதும் ஊவா மாகாண சபைத் தேர்தல் குறித்தே விரிவான முறையில் ஆராயப்பட்டுள்ளது. ஊவா மாகாண சபையின் பதவிக்காலம் எதிர்வரும் செப்டெம்பர் மாதத்துடன் நிறைவடைகின்ற நிலையில் எதிர்வரும் ஆகஸ்ட் மாதமளவில் ஊவா மாகாண சபைத் தேர்தலை அரசாங்கம் நடத்த திட்டமிட்டுள்ளது.
அரசியல் களநிலவரங்கள் என்பன அடிக்கடி நிலை மாறிக்கொண்டிருக்கும் அம்சங்களாகும். எனவே அரசியல் கள நிலைவரங்களுக்கு அமைய பாராளுமன்றத் தேர்தல் அல்லது ஜனாதிபதித் தேர்தலுக்கான அறிவிப்புகள் வெளிவரலாம்.
அதன்படி அண்மையில் தேசிய தேர்தல் தொடர்பில் கருத்து வெளியிட்டிருந்த ஆளும் கட்சியின் முக்கியஸ்தர் ஒருவர் விரைவில் பாராளுமன்றத் தேர்தலே நடைபெறும் சாத்தியம் இருப்பதாக தெரிவித்திருந்தார்.
ஆளும் கட்சியில் உள்ள முக்கியஸ்தர்கள் பலர் ஜனாதிபதி மற்றும் பாராளுமன்றத் தேர்தல்கள் தொடர்பில் வேறுபட்ட கருத்துக்களிலேயே உள்ளதாக தெரிவிக்கப்படுகின்றது. ஒருசிலர் முதலில் பாராளுமன்றத் தேர்தலை நடத்தவேண்டும் என்று கோருகின்ற அதேவேளை ஒருசிலர் ஜனாதிபதித் தேர்தலை நடத்தவேண்டும் என்று கோருவதாக கூறப்படுகின்றது.
இந்நிலையில் ஜனாதிபதி தேர்தல் முதலில் நடைபெறும் என்ற எடுகோளின் அடிப்படையில் எதிர்க்கட்சிகள் பொது வேட்பாளரை நிறுத்துவது தொடர்பில் பல்வேறு முயற்சிகளில் ஈடுபட்டுவருகின்றன. பொது வேட்பாளர் பட்டியலில் பல்வேறு முக்கியஸ்தர்களின் பெயர்கள் இடம்பெற்றுவருகின்றன.
மாதுளுவாவே சோபித்த தேரர், முன்னாள் ஜனாதிபதி சந்திரிகா பண்டாரநாயக்க குமாரதுங்க, முன்னாள் பிரதம நீதியரசர் ஷிராணி பண்டாரநாயக்க, வட மாகாண முதலமைச்சர் சி.வி.விக்கினேஸ்வரன் உள்ளிட்டோரின் பெயர்கள் பலராலும் உச்சரிக்கப்பட்டுக்கொண்டிருக்கின்றன. நிறைவேற்று அதிகாரம் கொண்ட ஜனாதிபதி முறைமை ஒழிக்கப்படவேண்டும் என்பதில் மாதுளுவாவே சோபித்த தேரர் உறுதியாக இருக்கின்றார்.
இது இவ்வாறு இருக்க பிரதான எதிர்க்கட்சியான ஐக்கிய தேசிய கட்சி யானது எந்தத் தேர்தலை அரசாங்கம் நடத்தினாலும் அதனை எதிர்கொள்ள தயாராக இருப்பதாக தெரிவித்துள்ளது. அண்மையில் ஐ.தே.க. வின் பாராளுமன்றக் குழுக்கூட்டத்தில் உரையாற்றியிருந்த கட்சியின் தேசிய தலைவர் ரணில் விக்ரமசிங்க எதிர்வரும் ஜனாதிபதித் தேர்தலில் தமது கட்சி தனி வேட்பாளரை நிறுத்தும் என்று கூறியிருந்ததாக ஊடகங்கள் செய்தி வெளியிட்டன. இதனடிப்படையில் பார்க்கும்போது ஐக்கிய தேசிய கட்சி எதிர்வரும் ஜனாதிபதி தேர்தலில் பொது வேட்பாளருக்கு ஆதரவு வழங்காமல் கட்சியின் வேட்பாளரை நிறுத்தும் என்றே ஊகிக்க முடிகின்றது.
எனினும் இந்த விவகாரம் குறித்து கருத்து வெளியிட்டிருந்த கட்சியின் பொதுச் செயலாளர் திஸ்ஸ அத்தநாயக்க, ஜனாதிபதி தேர்தல் அறிவிக்கப்பட்ட பின்னரே வேட்பாளரை நிறுத்துவது குறித்து பிரதான எதிர்க்கட்சியான ஐக்கிய தேசியக் கட்சி தீர்மானம் எடுக்கும் என்றும் தேர்தல் அறிவிக்கப்பட்ட பின்னர் அனைத்து எதிர்க்கட்சிகளுடனும் பேச்சுவார்த்தை நடத்தி ஒரு பொதுவான இணக்கப்பாட்டிற்கு வருவதற்கு எதிர்பார்ப்பதாகவும் கூறியிருந்தார்.
இந்த விடயம் குறித்து மேலும் கருத்து வெளியிட்டிருந்த அத்தநாயக்க குறிப்பிடுகையில் '' நிறைவேற்று அதிகாரம் கொண்ட ஜனாதிபதி முறைமையை நீக்கவேண்டும் என்பதில் நாங்கள் உறுதியாக இருப்பதோடு, அது தொடர்பில் புதிய அரசியல் அமைப்பு நகல் ஒன்றையும் முன்வைத்துள்ளோம். மேலும் மாதுளுவாவே சோபித்த தேரரும் இந்த விடயத்திற்காக முன்னிற்கின்றார். இந்நிலையில் அரசியல் கட்சிகளுடன் பேச்சுவார்த்தை நடத்தியே இது தொடர்பான முடிவை எடுக்கவேண்டும். இதற்கு எதிர்க்கட்சி அரசியல் கட்சிகளுடன் இணக்கப்பாட்டை எட்டவேண்டியது முக்கியமாகும்.
எவ்வாறெனினும் இவை அனைத்தும் ஜனாதிபதி தேர்தல் அறிவிக்கப்பட்ட பின்னரே சாத்தியமாகும். அது தொடர்பில் தற்போது எதனையும் கூறமுடியாது'' என்று குறிப்பிட்டிருந்தார்.
இதனிடையே மக்கள் விடுதலை முன்ன ணியும் பொது வேட்பாளர் விவகாரம் குறித்து கவனம் செலுத்தியுள்ளமை தெரிகின்றது.
அண்மையில் மக்கள் விடுதலை முன்னணியின் முக்கியஸ்தர்களுக்கும் மாதுளுவாவே சோபித்த தேரருக்கும் இடையில் முக்கிய சந்திப்பு ஒன்றும் நடைபெற்றிருந்தது. இது எதிர்கால அரசியல் நகர்வுகளில் மிக முக்கியமான நிலைமைகளை உருவாக்குவதாக அமையலாம். மக்கள் விடுதலை முன்னணியும் மாதுளுவாவே சோபித்த தேரரும் நிறைவேற்று அதிகாரம்கொண்ட ஜனாதிபதி முறைமையை நீக்கவேண்டும் என்ற ஒரே நிலைப்பாட்டில் இருக்கின்றமை இங்கு குறிப்பிடத்தக்கது.
எது எவ்வாறு இருப்பினும் நாட்டு மக்கள் அரசியல் தூரநோக்குடன் சிந்திக்க முன்வரவேண்டும். தேர்தல் என்பது ஜனநாயகத்தின் மிக முக்கிய அம்சமாகும். அந்த ஜனநாயக உரிமையை நாட்டு மக்கள் சிறந்த முறையில் பயன்படுத்தவேண்டியது அவசியமாகும்.
.jpg)
