அரசியல் தீர்வு ஒன்றை காண்பதற்கான செயற்பாடுகளின் தீர்க்கமான கட்டத்தில் மற்றுமொரு அத்தியாயம் வரலாற்றுடன் சேர்க்கப்பட்டுள்ளது.
இம்முறை அரங்கேற்றப்பட்டுள்ள இந்த குறுகிய கால செயற்பாட்டில் வரலா ற்றில் கடும் முட்கள் நிறைந்த பாதையில் பயணித்து விடிவை எட்டிய தென்னாபிரிக்கா முக்கிய கதாபாத்திரத்தை வகித்துள்ளது.
ஜெனிவாவில் அமைந்துள்ள ஐக்கிய நாடுகளின் மனித உரிமைப் பேரவையினால் இலங்கை மனித உரிமை விவகாரம் தொடர்பில் விசாரணை நடத்துவதற்கான விசாரணைக் குழுவும் நிபுணர் குழுவும் நியமிக்கப்பட்டுள்ள நிலையிலும் விசாரணைகள் குறித்த அழுத்தங்கள் அதிகரித்துள்ள பின்னணியிலும் தென்னாபிரிக்க பதில் ஜனாதிபதியின் இலங்கை விஜயம் இவ்வாரம் இடம்பெற்றுள்ளது.
ஆளும் ஐக்கிய மக்கள் சுதந்திர முன்னணியின் பங்காளிக் கட்சிகளான தேசிய சுதந்திர முன்னணி மற்றும் ஜாதிக ஹெல உறுமய ஆகிய கட்சிகளின் கடும் எதிர்ப்புக்கு மத்தியில் தென்னாபிரிக்க பிரதிநிதிகளின் இலங்கை விஜயம் இடம்பெற்றுள்ளது.
கடந்த திங்கட்கிழமை இலங்கைக்கு வந்த தென்னாபிரிக்க பிரதிநிதிகள் குழுவில் சிறில் ரமபோஷாவுடன் அந்நாட்டின் முன்னாள் பிரதியமைச்சர் இப்ராஹிம் இஸ்மாயில் இப்ராஹிம், மதிப்பீடு கண்காணிப்பு மற் றும் சாதனை தொடர்பான பிரதியமைச்சர் ஒபீட் போபிலா, நெல்சன் மண்டேலாவின் அமைச்சரவையில் உறுப்பினராக இருந்த ரோல்ப் மேயர் மற்றும் ஐவர் ஜென்கின்ஸ் ஆகியோர் இடம்பெற்றிருந்தனர்.
இலங்கை வந்த குழுவினர் முதல் சந்திப்பாகவே அரச தரப்புடன் பேச்சுவார்த்தை நடத்தினர். அரச தரப்பில் அரசாங்கத்தின் சார்பில் வெளிவிவகார அமைச்சர் ஜீ.எல். பீரிஸ், வெளிவிவகார அமைச்சின் கண்காணிப்பு உறுப்பினர் சஜின் வாஸ் குணவர்த்தன, நீர்ப்பாசன முகாமைத்துவ அமைச்சர் நிமால் சிறிபால டி.
சில்வா, நீதியமைச்சர் ரவூப் ஹக்கீம் மற்றும் முதலீட்டு ஊக்குவிப்பு பிரதியமைச்சர் பைஸர் முஸ்தபா, சிறிலங்கா சுதந்திரக் கட்சியின் மட்டக்களப்பு மாவட்ட அமைப்பாளர் அருண் தம்பிமுத்து உள்ளிட்ட பலர் கலந்துகொண்டனர். தென்னாபிரிக்க பிரதிநிதிகள் குழுவுக்கும் அரச தரப்பு பிரதிநிதிகள் குழுவுக்கும் இடையிலான சந்திப்பின்போது அரசியல் தீர்வு விவகாரம் விரிவாக பேசப்பட்டுள்ளது.
குறிப்பாக தீர்வு தொடர்பிலான அரசாங்கத்தின் நிலைப்பாடு என்ன என்பது இதன்போது தென்னாபிரிக்க குழுவினருக்கு அரச தரப்பு பிரதிநிதிகளினால் தெளிவாக விளக்கப்பட்டுள்ளதாக தெரிவிக்கப்படுகின்றது. விசேடமாக தீர்வுக்கான இணக்கப்பாட்டை அடைவதற்கான பாராளுமன்றத் தெரிவுக்குழு குறித்து இதன்போது விரிவாக கலந்துரையாடப்பட்டுள்ளது.
மேலும் போருக்குப் பின்னரான நல்லிணக்க செயற்பாடுகள் தொடர்பாகவும் தென்னாபிரிக்காவில் முன்னெடுக்கப்பட்ட உண்மையை கண்டறியும் ஆணைக்குழு தொடர்பாகவும் விரிவான பேச்சுக்கள் இந்த சந்திப்பின்போது இடம்பெற்றுள்ளன.
தென்னாபிரிக்காவில் முன்னெடுக்கப்பட்டதைப்போன்ற உண்மையை கண்டறியும் ஆணைக்குழு ஒன்றின் அனுபவங்களை பகிர்வது குறித்தும் ஆராயப்பட்டுள்ளது. அரச தரப்புக்களுடனான சந்திப்பின் பின்னர் ரமபோஷா குழுவினர் ஜனாதிபதி மஹிந்த ராஜபக் ஷவின் இரவு விருந்துபசாரத்தில் கலந்துகொண்டனர்.
இதன்போதும் ரமபோஷாவுக்கும் ஜனாதிபதிக்கும் இடை யில் கலந்துரையாடல் ஒன்று இடம்பெற்றுள்ளது. இதன்போது தமிழ்த் தேசியக் கூட்டமைப்புடன் நேரடிப் பேச்சுக்களுக்குத் தயாரா என்று ரமபோஷா ஜனாதிபதியிடம் வினவியதாக தெரிவிக்கப்பட்டுள்ளது.
இதற்கு பதிலளித்த ஜனாதிபதி பேச்சுவார்த்தைக்கு சிறந்த இடமாக தெரிவுக்குழுவே உள்ளது. இதன்மூலமே சகல தரப்புக்களும் ஏற்றுக்கொள்ளக்கூடிய தீர்வைக்காண முடியும் என்று பதிலளித்துள்ளார். ஆனால் பாராளுமன்றத் தெரிவுக்குழுவின் செயற்பாடுகளையும் கூட்டமைப் புடனான நேரடிப் பேச்சுக்களையும் சமாந்தரமாக கொண்டு நடத்த தயாரா என்று ரம போஷா வினவியபோது அது குறித்து சிந்திக்கவேண்டும் என்று ஜனாதிபதி குறிப்பிட் டுள்ளதாக தெரிவிக்கப்படுகின்றது.
இந்நிலையில் மறுநாள் செவ்வாய்க்கிழமை காலை ரமபோஷா குழுவினர் இரா. சம்பந்தன் தலைமையிலான தமிழ்த் தேசியக் கூட்டமைப்பின் பிரதிநிதிகளை சந்தித்துப் பேச்சுவார்த்தை நடத்தியுள்ளனர். இந்தப் பேச்சுவார்த்தையின்போது தீர்வு விவகாரம் குறித்து நீண்டநேரம் கலந்துரையாடப்பட்டுள்ளது.
குறிப்பாக யுத்தத்தின பின்னரான நிலைமைகள் தீர்வு செயற்பாட்டின் தற்போதைய நிலை என்பன குறித்து விரிவாக பேசப்பட்டுள்ளது. உடனடியாக பாராளுமன்றத் தெரிவுக்குழுவில் தமிழ்த் தேசியக் கூட்டமைப்பு பங்கேற்பதன் சிக்கல் குறித்தும் ரமபோஷாவுக்கு எடுத்துக்கூறப்பட்டுள்ளது.
ஆனால் தென்னாபிரிக்காவின் உதவியுடனான அரசியல் தீர்வு செயற்பாடுகளுக்கு பூரண ஒத்துழைப்பை வழங்கத் தயார் என கூட்டமைப்பினர் ரமபோஷாவிடம் உறுதியளித்துள்ளனர். இந்நிலையில் யாழ்ப்பாணத்துக்கு சென்று வட மாகாண ஆளுநரையும் முதலமைச்சரையும் சந்தித்து விட்டு கொழும்பு திரும்பிய ரமபோஷா குழுவினர் செவ்வாய்க்கிழமை பிற்பகல் அவசரமாக நாடு திரும்பினர்.
தென்னாபிரிக்க ஜனாதிபதி ஜேக்கப் சூமா சுகவீனமுற்றிருப்பதால் தற்போது பதில் ஜனாதிபதியாக இருக்கும் ரமபோஷா அந்நாட்டின் அமைச்சரவைக் கூட்டத்துக்கு தலைமைதாங்கவேண்டியிருந்ததால் இவ்வாறு ரமபோஷா குழுவினர் குறுகியகால விஜயத்தை முடித்துக்கொண்டு நாடு திரும்பினர்.
அந்தவகையில் தென்னாபிரிக்க பதில் ஜனாதிபதி ரமபோஷா தலைமையிலான குழுவினரின் இலங்கை விஜயமும் இரண்டு தரப்புக்களுடனான சந்திப்புக்களும் அரசியல் தீர்வு செயற்பாட்டில் எவ்வாறான தாக்கத்தை ஏற்படுத்தும் என்பது குறித்து நாம் சிந்திக்கவேண்டியுள்ளது.
வரலாற்றில் மேற்கொள்ளப்பட்ட பல்வேறு முயற்சிகளை போன்று இதுவும் ஒரு முயற்சி மட்டும்தானா அல்லது அதனையும் தாண்டி தமிழர் பிரச்சினைக்கு நியாயமான அரசியல் தீர்வு ஒன்றை பெறுவதற்கான வழியை ஏற்படுத்துமா என்பதே தற்போதைய நிலைமையில் அனைவர் மத்தியிலும் எழுந்துள்ள கேள்வியாகவுள்ளது.
சிறில் ரமபோஷாவின் வருகை தீர்வை விரும்பும் மக்கள் மத்தியில் பாரிய எதிர்ப்பார்ப்பையும் நல்லெண்ணத்தையும் தோற்றுவித்திருந்தது. அரசாங்கத்துக்கும் தமிழ்த் தேசியக் கூட்டமைப்புக்கும் இடையிலான முறிவடைந்துபோயுள்ள தீர்வு தொடர்பான பேச்சுக்களை மீள ஆரம்பிப்பதற்கு தென்னாபிரிக்காவின் மத்தியஸ்தமும் சிறில் ரமபோஷாவின் வருகையும் வழி வகுக்கும் என்பதே இந்த எதிர்பார்ப்பாக இருந்தது.
ஆனால், மிகவும் குறுகிய கால விஜயத்தினை மேற்கொண்டு இலங்கை வந்த ரம போஷா தலைமையிலான குழுவினர் அரசாங்கத் தரப்பு எதிர்த்தரப்பு மற்றும் கூட்டமைப்பு பிரதிநிதிகளை மட்டும் சந்தித்து விட்டு சென்றுள்ளனர்.
இந்நிலையில் தென்னாபிரிக்க தூதுக்குழுவினர் மேற்கொண்ட சந்திப்புக்களின்போது தீர்வு குறித்த ஏதாவது சாதகமாக கருத்துக்களோ தோற்றப்பாடுகளோ முன்வைக்கப்பட்டதா? என்ற கேள்விக்கு எமக்கு இதுவரை பதில் கிடைக்கவில்லை. அரச தரப்புடனான சந்திப்பின்போது அரசாங்கம் தமது நிலைப்பாட்டை தெரிவித்துள்ளது.
தமிழ்த் தேசியக் கூட்டமைப்புடனான சந்திப்பின்போது கூட்டமைப்பு தனது நிலைப்பாட்டை தெளிவாக குறிப்பிட்டுள்ளது. இந்நிலையில் அடுத்தக் கட்ட நகர்வுகள் மற்றும் செயற்பாடுகள் எவ்வாறு அமையப்போகின்றன என்று பார்க்கவேண்டும்.
பாராளுமன்றத் தெரிவுக்குழுவையும் வைத்துக்கொண்டு சமாந்தரமாக கூட்டமைப்புடன் நேரடிப் பேச்சுக்களை நடத்த முடியுமா? என்று ரமபோஷா ஆளும் தரப்பிடம் எழுப்பியுள்ள கேள்வியானது தீர்வு விடயத்தில் ஆரோக்கியமான நிலைமை உருவாகும் என்ற எண்ணத்தை ஓரளவு ஏற்படுத்தியுள்ளது. அதாவது அவர் புதிய அணுகுமுறை ஒன்றுக்கு முயற்சித்துள்ளமை தெளிவாகின்றது.
எனினும் ரமபோஷாவின் விஜயத்தின் பின்னர் அமைச்சரவை பேச்சாளரும் அமைச்சருமான கெஹெலிய ரம்புக்வெலவின் கருத்து இந்த எண்ணத்தில் சிக்கல் நிலையை தோற்றுவித்துள்ளது என்று கூறலாம். அதாவது தமிழ் மக்களின் பிரச்சினைகள் தொடர்பில் அரசியல் தீர்வு ஒன்றை அடைவதற்காக அர்ப்பணிப்புடன் செயற்படவேண்டிய பொறுப்பு அரசாங்கத்துக்கு இருக்கின்றது.
ஆனால் அதனைவிட பாரிய பொறுப்பு தமிழ்த் தேசியக் கூட்டமைப்புக்கு இருக்கின்றது. எனவே தீர்வு விடயத்தில் கூட்டமைப்பே தனது நிலைப்பாட்டிலிருந்து இறங்கிவரவேண்டியுள்ளது என குறிப்பிடுகின்றார். அதாவது கூட்டமைப்பே தனது நிலைப்பாட்டிலிருந்து இறங்கிவர முடியாது என்று கூறிக்கொண்டிருக்கையில் அனைத்து இன மக்கள் குறித்தும் பொறுப்புக்கூறக்கூடிய அரசாங்கம் எவ்வாறு இறங்கிச் செல்வது என்றும் அமைச்சர் கேள்வியெழுப்புகின்றார்.
குறிப்பாக கூட்டமைப்புடன் மட்டும் இருதரப்பு பேச்சுக்களை அரசாங்கம் நடத்தினால் ஏனைய சிறுபான்மை கட்சிகளுக்கு அரசாங்கம் அநீதி இழைப்பதாக அமைந்துவிடும். குறிப்பாக முஸ்லிம் அரசியல் கட்சிகளும் மலையக அரசியல் கட்சிகளும் இந்த விடயம் தொடர்பில் அரசாங்கத்திடம் கேள்வி எழுப்பினால் எவ்வாறு பதிலளிப்பது? என்று அமைச்சர் கேள்வியெழுப்புகின்றார்.
தமிழ் மக்களின் அரசியல் பிரச்சினைக்கு அரசியல் தீர்வு ஒன்றை பெற்றுக்கொடுக்கவேண்டும் என்ற உணர்வும் பொறுப்பும் எங்களுக்கு இருக்கின்றது. அதனை நாங்கள் மறுக்கவில்லை. ஆனால் எங்களைவிட அதிகமாக கூட்டமைப்புக்கு இந்த உணர்வும் அக்கறையும் இருக்கவேணடும் என்று அமைச்சர் கூறுகின்றார்.
அமைச்சரின் கருத்தைப் பார்க்கும்போது அரசாங்கம் ஒருபோதும் தமிழ்த் தேசியக் கூட்டமைப்புடன் தனித்து பேச்சுவார்த்தைகளை நடத்த விரும்பவில்லை என்பது தெளிவாகின்றது. இந்நிலையில் தென்னாபிரிக்காவின் மத்தியஸ்தத்துடனான நகர்வுகள் வெற்றியளிக்குமா என்ற கேள்வி எழுகின்றது. எவ்வாறெனினும் தென்னாபிரிக்காவின் இந்த உதவியும் அனுபவப் பகிர்வும் வெற்றியளிக்குமா? என்று தற்போது எதிர்வு கூறமுடியாது. அதற்கு நாம் முயற்சிக்கவுமில்லை.
ஆனால் அரசாங்கம் கூட்டமைப்புடன் தனித்து பேச்சு நடத்தமாட்டோம் என்று அடம்பிடிக்கும்போது எவ்வாறு தீர்வு முயற்சிகள் சாத்தியமாகும் என்பதே எமது முன்னுள்ள முரண்பாடான நிலையாகவுள்ளது. கூட்டமைப்பை பொறுத்தவரை இருதரப்பு பேச்சுக்களின்போது இணக்கப்பாட்டுக்கு வந்தவாறு அரசாங்கமும் கூட்டமைப்பும் பேச்சு நடத்தி அதனடிப்படையில் எட்டப்படுகின்ற உடன்பாட்டின் அடிப்படையில் தெரிவுக்குழுவுக்கு வருவது குறித்து சிந்திக்க முடியும் என்று கூறுகின்றது.
இவ்வாறு இரண்டு தரப்புக்கள் மத்தியிலும் எதிரும் புதிருமான நிலைப்பாடுகள் இருக்கையில் தென்னாபிரிக்காவின் மத்தியஸ்தம் எந்தளவு தூரம் தமிழ் மக்களுக்கு தீர்வைப் பெற்றுத்தரும் என்று பார்க்கவேண்டும். இந்நிலையில் அன்று முதல் தீர்வு குறித்தும் அதிகாரப் பகிர்வு தொடர்பாகவும் குரல் கொடுத்துவரும் அமைச்சர் ராஜித்த சேனாரட்ன ரமபோஷாவின் விஜயம் மற்றும் தென்னாபிரிக்காவின் மத்தியஸ்தம் குறித்து இவ்வாறான கருத்தை வெளியிடுகின்றார்.
அதாவது ரமபோஷா என்பவர் தென்னாபிரிக்காவின் முக்கிய அரசியல் தலைவர் அவர் போன்ற ஒரு இராஜதந்திரியுடன் இலங்கை அரசாங்கம் தொடர்புகளை பேணு வதானது மிகவும் சிறப்பு வாய்ந்த விடயமாக அமையும். குறிப்பாக ரமபோஷா நெல்சன் மண்டேலா காலத்தில் மிகவும் வலுவாக செயற்பட்ட ஒருவராவார்.
எனவே இந்த முயற்சி தீர்வு விடயத்தில் சிறந்த பலனைத் தரும் என்று நாம் நம்பலாம். எனினும் நிலைமைகள் எவ்வாறு அமைகின்றன என்று பார்க்கவேண்டும் என்று கூறுகின்றார். நிலைமைகள் எவ்வாறு அமையும் என்று பார்க்க வேண்டும் என்று கூறுவதிலிருந்து அமைச்சரின் எண்ணத்திலும் சிறு தளர்வை காணக்கூடியதாக உள்ளது.
கடந்த கால அனுபவங்களை வைத்து அவர் அவ்வாறு கூறியிருக்கலாம். இது இவ்வாறு இருக்க அரசாங்கத்தின் அழைப்பின் பேரிலேயே தென்னாபிரிக்காவின் விசேட பிரதிநிதி நியமிக்கப்பட்டதுடன் தூதுக்குழுவின் விஜயமும் அமைந்தது. ஆனால் ஆளும் ஐக்கிய மக்கள் சுதந்திர முன்னணியில் அங்கம் வகிக்கும் தேசிய சுதந்திர முன்னணி மற்றும் ஜாதிக்க ஹெல உறுமய என்பன தென்னாபிரிக்காவின் மத்தியஸ்தத்தை கடுமையாக விமர்சித்தன.
எனினும் அந்த எதிர்ப்புக்களை மீறி ரமபோஷா தலைமையிலான குழுவினரின் விஜயம் அமைந்தது. ஆனால் பங்காளிக் கட்சிகளின் எதிர்ப்புகள் குறித்து ரமபோஷா தரப்பு கவலையும் வெளியிட்டிருந்தது. தாங்கள் அரசாங்கத்தின் அழைப்பின் பேரிலேயே இலங்கைக்கு வருகை தந்துள்ளதாக ரமபோஷா குழு தெரிவித்தும் இருந்தது.
இந்நிலையில் அரசாங்கத்தின் முக்கிய அமைச்சர்கள் பலரும் தென்னாபிரிக்காவின் செயற்பாட்டை தீர்வு முயற்சியில் மூன்றாம் தரப்பு அல்ல என்பதனை அழுத்தம் திருத்தமாக கூறிவருகின்றனர். உதாரணமாக அமைச்சர் டலஸ் அழகப்பெரும இந்த விடயம் குறித்து இவ்வாறு தெரிவிக்கின்றார்.
அதாவது ரமபோஷா மூன்றாம் தரப்பாக இலங்கை வருவதாக கூறப்படுவது ஊடகங்கள் உருவாக்கிய கதையாகும். தென்னாபிரிக்க பிரதிநிதி சிறில் ரமபோஷா மூன்றாம் தரப்பாக வருபவராக கூறியுள்ளாரா? இல்லை. தென்னாபிரிக்க அரசாங்கம் உத்தியோகபூர்வமாக கூறவுமில்லை. ஊடகங்கள் இது தொடர்பில் கதையை உருவாக்கியுள்ளன என்று அமைச்சர் குறிப்பிடுகின்றார்.
தென்னாபிரிக்கா தமது அனுபவங்களை பகிர்ந்துகொள்ள வரும்போது நாம் புறந்தள்ள முடியாது. மூன்றாவது தரப்பு என்று கூறும்போது நோர்வே நினைவுக்கு வருகின்றது. ஆனால் இந்த செயற்பாட்டுடன் நோர்வேயை சம்பந்தப்படுத்த முடியாது. இது அவ்வாறானதாக இல்லை. உள்நாட்டு மோதலின் பின்னர் வெற்றிகரமான முறையில் சமாதானத்தை அடைந்த நாடு என்ற வகையில் தென்னாபிரிக்காவிடம் சமாதான செயற்பாடுகள் தொடர்பில் கற்கவேண்டிய விடயங்கள் எமக்கு அதிகமாகவே உள்ளன என்றும் அமைச்சர் குறிப்பிடுகின்றார்.
இந்நிலையில் தேசிய பிரச்சினைக்கான அரசியல் தீர்வு செயற்பாட்டில் இவ்வாறு அவ்வப்போது தீர்க்கமான நகர்வுகள் இடம்பெறுவது போன்ற தோற்றப்பாடுகள் காணப்பட்டாலும் இறுதியில் தோல்வி கண்ட வரலாற்றையே நாம் கொண்டுள் ளோம். அரசாங்கத்துக்கும் தமிழர் தரப்புக் கும் இடையிலான திம்பு பேச்சுவார்த்தை முதல் ஒஸ்லோப் பேச்சுவார்த்தை வரை எதுவுமே வெற்றிபெறும் பாதையை நோக்கி நகரவில்லை.
இருதரப்பு இணக் கப்பாடுகள் எட்டப்படும் சாத்தியங்கள் பல சந்தர்ப்பங்களில் தென்பட்டபோதும் தமிழ் மக்களின் துரதிர்ஷ்டவசமான நிலையாக எந்தத் தீர்வும் கிடைக்கவில்லை. எவ்வாறெனினும் தற்போதைய தென்னாபிரிக்காவின் மத்தியஸ்தத்துடனாவது தமிழ் மக்களின் அரசியல் தீர்வு பிரச்சினைக்கு உரிய தீர்வு கிடைக்கும் என்பதே தமிழ் பேசும் மக்க ளின் பாரிய எதிர்பார்ப்பாகவுள்ளது என்பதனை யாரும் மறுக்க முடியாது.
–ரொபட் அன்டனி–
.jpg)
.jpg)
