முடிசூடப்போவது ஐரோப்பாவின் ஜேர்மனியா? அல்லது தென் அமெரிக்காவின் ஆர்ஜென்டீனாவா? என்ற பல கோடி பேரின் கேள்வி, காத்திருப்பு போன்றவற்றுக்கான விடை இன்று கிடைத்துவிடும்.
பிரேஸிலின் தலைநகரான ரியோ டி ஜெனிரோவின் மரக்கானா மைதானத்தில் இலங்கை நேரப்படி 14ஆம் திகதி நள்ளிரவு 12.30 மணிக்கு இரு அணிகளும் களமிறங்க காத்திருக்கின்றன. ஆர்ஜென்டீனா அணி 28 ஆண்டுகளுக்குப் பின்னரும் ஜேர்மனி அணி 24 ஆண்டுகளுக்குப் பின்னரும் கிண்ணத்தை வென்று சம்பியனாகும் கனவுடன் இன்றைய போட்டியில் விளையாடவுள்ளன.
ஆர்ஜென்டீனா அணி 1986 ஆம் ஆண்டு இறுதியாக கிண்ணத்தை சுவீகரித்திருந்ததுடன் ஜேர்மனி அணி இறுதியாக 1990 ஆம் ஆண்டு கிண்ணத்தை கைப்பற்றியிருந்தது. இதனால் கால்பந்தாட்ட ரசிகர்களிடையே இவ்விரு அணிகளுக்குமிடையிலான எதிர்பார்ப்பு மேலும் அதிகரித்து காணப்படுகின்றன.
கடந்த ஜூன் 12 ஆம் திகதி சர்வதேச கால்பந்தாட்ட சம்மேளனத்தின் (பீபா) 20 ஆவது உலகக் கிண்ண கால்பந்தாட்டத் தொடர் ஆரம்பமானது. இதில் 8 குழுக்கள் தலா 4 அணிகள் வீதம் 32 அணிகள் பங்கு கொண்டன. முதல் சுற்றின்போது 8 குழுக்களிலும் முதலிரு இடங்களைப் பிடித்த 16 அணிகள் இரண்டாவது சுற்றுக்கு தெரிவாகின.
இரண்டாவது சுற்றில் வெற்றி பெற்ற 8 அணிகள் காலிறுதிச் சுற்றுக்கு நுழைந்தன. இதன்போது காலிறுதிச் சுற்றுக்கு பிரேஸில், சிலி, நெதர்லாந்து, மெக்ஸிக்கோ, கொலம்பியா, உருகுவே, கொஸ்டரிகா, கிறீஸ், பிரான்ஸ், நைஜீரியா, ஆர்ஜென்டீனா, சுவிட்ஸர்லாந்து, ஜேர்மனி, அல்ஜீரியா, பெல்ஜியம், ஐக்கிய அமெரிக்கா ஆகிய அணிகள் தகுதி பெற்றன.
இதன் பின்னர் முதலாவது அரையிறுதிக்கு போட்டியை நடத்தும் நாடான பிரேஸிலும் ஜேர்மனியும் மோதின. இதில் பிரேஸில் வரலாற்றில் மிகவும் மோசமான முறையில் ஜேர்மனியிடம் தோல்வியடைந்து, பலகோடி பிரேஸில் ரசிகர்களின் எதிர்ப்பார்ப்பை ஏமாற்றத்துக்குள்ளாக்கியது.
இப் போட்டியில் ஜேர்மனி அணி 7-–1 என்ற கோல்கள் அடிப்படையில் வெற்றி பெற்றது. இந்த வெற்றி மூலம் 8 தடவைகள் இறுதிப் போட்டிக்குத் தெரிவான முதல் அணியாக ஜேர்மனி சாதனை படைத்தது. இப் போட்டியின் இரண்டாவது கோலை மிரஸ்லொவ் குளோஸ் போட்டு உலகக் கிண்ண அரங்கில் அதிக கோல்களை அடித்த வீரர் என்ற சாதனையை படைத்தார்.
இரண்டாவது அரையிறுதிப் போட்டியில் ஆர்ஜென்டீனா மற்றும் நெதர்லாந்து ஆகிய அணிகள் மோதின. இதில் முதல் 90 நிமிடங்களில் இரு அணிகளாலும் கோல் போடமுடியவில்லை. இதனால் போட்டி மேலதிக 30 நிமிடங்களுக்கு நகர்ந்தது. இதிலும் இரு அணி வீரர்களாலும் கோல் போடப் பாரிய முயற்சிகள் மேற்கொள்ளப்பட்டபோதிலும் பந்தை கோல் வலைக்குள் புகுத்த முடியாது போனது.
இதனால் போட்டியின் முடிவை தீர்மானிக்க பெனால்டி ஷூட் அவுட் முறைக்கு கொண்டு செல்லப்பட்டது. பெனால்ட்டி உதையில் 4–2 என்ற கோல்கள் கணக்கில் ஆர்ஜென்டீனா வெற்றி பெற்று 5 ஆவது முறையாக இறுதிப் போட்டிக்கு விளையாடத் தகுதி பெற்றது. இதில் முதலாவது மற்றும் மூன்றாவது பெனால்டி உதைகளை ஆர்ஜென்டீனாவின் கோல்காப்பாளரான ரொமெரோ தடுத்து ஆர்ஜென்டீனாவின் வெற்றிக்கு உறுதுணையாக இருந்தார்.
இன்று நடைபெறும் இறுதிப் போட்டியில் இரு அணிகளும் சமபலமான அணிகளாகவே கருதப்படுகின்றன. ஆர்ஜென்டீனா அணியானது மெஸ்ஸியை நம்பியே உள்ளது. மெஸ்ஸியைத் தவிர டி மரியா, ஹிகுவெய்ன் போன்ற வீரர்களின் செயற்பாடு சிறப்பாக உள்ளதுடன், அவ்வணியில் பலமிக்க பின்கள வீரர்கள் காணப்படுகின்றமை அணியின் பலமாகும்.
அத்துடன் அணியின் கோல்காப்பாளரான ரொமெரோ நம்பிக்கை அளித்து வருகிறார். இத்தொடரில் 5 போட்டிகளில் விளையாடியுள்ள ஆர்ஜென்டீனா அணி (பெனால்டி உதைகளைத் தவிர்த்து) 8 கோல்களை மாத்திரமே அடித்துள்ளன. இது அவ்வணியின் முன்கள வீரர்களின் செயற்பாட்டின் கோல் போடும் குறையை சுட்டிகாட்டுகின்றபோதிலும் ஆர்ஜென்டீனா அணிக்கு எதிராக ஏனைய அணிகள் 3 கோல்கள் மாத்திரமே (பெனால்டி உதைகளை தவிர்த்து) போட்டுள்ளமை கவனிக்கத்தக்கது.
இதேவேளை ஜேர்மனி அணியில் முல்லர், குளோஸ், ஹம்ல்ஸ், ஷுர்ல், குரூஸ் என நட்சத்திர பட்டாளமே காணப்படுகின்றது. பலமிக்க முன்கள வீரர்கள் காணப்படுகின்றமை இவ்வணியின் பலமாகும். இவர்கள் அனைவரும் அணிக்காக இரண்டுக்கும் மேற்பட்ட கோல்களை அடித்து அணியின் வெற்றிக்கு பாரிய பங்காற்றியுள்ளனர்.
ஜேர்மனி அணி 17 கோல்களை அடித்து இத்தொடரில் அதிக கோல்களை அடித்த அணியாக காணப்படுகின்றது. இது அவ்வணியின் முன்கள வீரர்கள் பலத்தை எடுத்துக் காட்டுகின்றது. இவ்விரு அணிகளும் இதுவரை 20 போட்டிகளில் ஒன்றையொன்று சந்தித்துள்ளன. இதில் ஜேர்மனி அணி 9 தடவைகளும் ஆர்ஜென்டீனா அணி 6 தடவைகளும் வெற்றி பெற்றுள்ளன. ஏனைய 5 போட்டிகள் சமநிலையில் முடிவடைந்தன.
உலகக் கிண்ண இறுதிப் போட்டியில் இவ்விரு அணிகளும் மூன்றாவது தடவையாக இறுதிப்போட்டியில் நேருக்கு நேர் சந்திக்கவுள்ளன. இதற்கு முன்னர் 1986ஆம் ஆண்டு உலகக் கிண்ண இறுதிப்போட்டியில் ஆர்ஜென்டீனா 3–-2 என்ற கோல் கணக்கில் ஜேர்மனியை வீழ்த்தியது.
இதன்பின்னர் 1990ஆம் ஆண்டு நடைபெற்ற உலகக் கிண்ண தொடரின் இறுதிப்போட்டியில் ஜேர்மனி அணி 1–0 என்ற கோல் கணக்கில் ஆர்ஜென்டீனாவை வென்று பழிதீர்த்தது. இதனால் மூன்றாவது முறையாக இவ்விரு அணிகளும் இறுதிப்போட்டியில் சந்திக்கின்றமை ரசிகர்களிடத்தில் மேலும் சுவாரஷ்யத்தை ஏற்படுத்தியுள்ளது.
மேலும் இப்போட்டி தென் அமெரிக்காவுக்கும் ஐரோப்பாவுக்கும் இடையிலான போட்டியாகவும் பார்க்கப்படுகின்றது. அத்துடன், ஐரோப்பா கண்டத்தில் நடை பெற்ற உலகக் கிண்ண தொடரில் தென் அமெரிக்க நாடொன்று சம்பியனாகியிருந்தபோதிலும் தென் அமெரிக்கா கண்டத்தில் நடைபெற்ற உலகக் கிண்ண தொட ரொன்றில் இதுவரை எந்தவொரு ஐரோப்பிய நாடு கிண்ணத்தை வென்றதில்லை.
இந்த விடயத்தை ஆர்ஜென்டீனா வெற்றி பெற்று தொடர வைக்குமா? அல்லது ஜேர்மனி வெற்றி பெற்று முற்றுப் புள்ளி வைக்குமா? என்பதை பொறுத்திருந்து பார்ப்போம்.
.jpg)
.jpg)
