இன்றைய சந்திப்பு ஆக்கபூர்வமானதாக அமைந்தது. அவர்கள் தமது நாட்டில் ஏற்பட்ட பிரச்சினைகளை எவ்வாறு முடிவுக்குக் கொண்டு வந்தனர் என்பது குறித்து எமக்கு விளக்கினர்.
இலங்கை இனப்பிரச்சினைக்குத் தீர்வை எட்டுவதற்கு தாம் முழு ஆதரவை வழங்குவோம் என்றும் தென்னாபிரிக்க குழுவினர் உறுதியளித்தனர் என்று தமிழ்த்தேசியக் கூட்டமைப்பின் தலைவரும் நாடாளுமன்ற உறுப்பினருமான இரா.சம்பந்தன் தெரிவித்துள்ளார். தென்னாபிரிக்க உப ஜனாதிபதி சிறில் ரமபோஷா தலைமையிலான குழுவினர் இன்று காலை 7.15 மணி தொடக்கம் 8.45 மணி வரை தமிழ்த் தேசியக் கூட்டமைப்புப் பிரதிநிதிகளை கொழும்பில் சந்தித்துப் பேசினர்.
இந்தச் சந்திப்புக் குறித்து அவர் மேலும் தெரிவித்தவை வருமாறு:-
ஏற்கனவே தென்னாபிரிக்காவில் நாம் தீர்வு முயற்சிகள் குறித்து சந்திப்புக்களை நடத்தியிருந்தோம். இதன் தொடர்ச்சியாகவே இன்றைய சந்திப்பும் அமைந்தது. இந்தப் பேச்சும் எமக்குத் திருப்திகரமாக அமைந்தது. அவர்கள் தமது நாட்டுப் பிரச்சினை எவ்வாறு தீர்க்கப்பட்டது என்பது குறித்து விளக்கினர். இலங்கை இனப்பிரச்சினையைத் தீர்ப்பதற்கு தென்னாபிரிக்கக் குழுவினர் மத்தியஸ்தம் வழங்கினால் நாம் அவர்களுக்குப் பூரண ஒத்துழைப்பு வழங்குவோம்.
இங்கு பல தரப்பட்ட தரப்பினர் இருக்கின்றனர் அவர்களுடனும் விரிவாகப் பேசி ஓர் இணக்கத்திற்கு வருவதே முக்கியமானது – என்றார். இன்றைய சந்திப்பில் தென்னாபிரிக்க குழு சார்பில் அந்நாட்டு உதவி ஜனாதிபதி சிறில் ரமபோஷ, உதவி வெளிவிவகார அமைச்சர் இப்ராகிப் இஸ்மாயில் இப்ராகிம், தற்போது ரமபோஷவின் சிரேஸ்ட ஆலோசகர் றூத் மேயர், ஐவர் ஜெனின், இலங்கைக்கான தென்னாபிரிக்கத் தூதுவர் ஆகியோர் கலந்துகொண்டனர்.
தென்னாபிரிக்க கறுப்பினப் பெரும்பான்மையினருக்கும் சிறுபான்மை வெள்ளையருக்குமிடையில் ஏற்பட்ட பிரச்சினைகளைத் தீர்ப்பதற்கு முக்கிய பங்காற்றியவர்களாக ரமபோஷவும் றூத் மேயரும் விளங்குகின்றனர். கறுப்பினத் தலைவர் நெல்சன் மண்டேலாவின் பிரதிநிதியாக இப்போதைய உப ஜனாதிபதி சிறில் ரமபோஷவும் வெள்ளையர்களின் பிரதமரான டி கிளார்க்கின் பிரதிநிதியாக றூத் மேயரும் செயற்பட்டனர். இவர்கள் இருவரின் மூலமே அந்த நாட்டுப் பிரச்சினை தீர்க்கப்பட்டது.
இந்த நிலையில் இரண்டு தரப்பிலுமாக முக்கியத்துவம் வகித்த பிரதிநிதிகள் இலங்கை விவகாரத்தைக் கையாள்வதற்கு வந்திருப்பது முக்கியமானது என்று அரசியல் வட்டாரங்களில் பேசப்படுகிறது. கூட்டமைப்பு பிரதிநிதிகள் சார்பாக சம்பந்தனுடன் நாடாளுமன்ற உறுப்பினர்களான மாவை சேனாதிராஜா, சுரேஷ் பிரேமச்சந்திரன், எம்.ஏ.சுமந்திரன் ஆகியோர் இன்றைய சந்திப்பில் கலந்துகொண்டனர்.
இதேவேளை இன்று முற்பகல் 11 மணியளவில் யாழ்ப்பாணத்தைச் சென்றடைந்துள்ள தென்னாபிரிக்கக் குழு வடக்கு மாகாண முதலமைச்சர் தலைமையிலான குழுவினரை ரில்கோ விடுதியில் சந்தித்து கலந்துரையாடலில் ஈடுபட்டுவருவதாக பிராந்திய செய்தியாளர் தெரிவிக்கின்றார்.
முன்னைய செய்தி
இலங்கைக்கு நேற்று வருகைதந்துள்ள தென்னாபிரிக்க பதில் ஜனாதிபதி சிறில் ரமபோஷா தலைமையிலான இராஜதந்திரிகள் குழுவினர் நேற்றுமாலை கொழும்பில் அரச தரப்பு முக்கியஸ்தர்களை சந்தித்து விரிவான பேச்சுவார்த்தைகளை நடத்தியுள்ளனர்.
கொழும்பில் உள்ள தாஜ்சமுத்திரா ஹோட்டலில் நடைபெற்ற இந்த சந்திப்பில் போருக்குப் பின்னரான இலங்கையின் தற்போதைய நிலைமை மற்றும் நல்லிணக்க செயற்பாடுகள், அரசியல் தீர்வுக்கான நகர்வுகள் உள்ளிட்ட பல்வேறு விடயங்கள் குறித்து விரிவாக கலந்துரையாடப்பட்டுள்ளது.
தென்னாபிரிக்க பிரதிநிதிகள் குழுவில் சிறில் ரமபோஷாவுடன் அந்நாட்டின் பிரதியமைச்சர் இப்றாஹிம் இஸ்மாயில் இப்றாஹிம், மதிப்பீடு கண்காணிப்பு மற்றும் சாதனை தொடர்பான பிரதியமைச்சர் ஒபீட் போபிலா, நெல்சன் மண்டேலாவின் அமைச்சரவையில் உறுப்பினராக இருந்த ரோல்ப் மேயர் மற்றும் ஐவர் ஜென்கின்ஸ் ஆகியோர் இடம்பெற்றுள்ளனர்.
முக்கிய அமைச்சர்கள் சந்திப்பு நேற்று மாலை இடம்பெற்ற சந்திப்பில் அரசாங்கத்தின் சார்பில் வெளிவிவகார அமைச்சர் ஜீ.எல். பீரிஸ், பொருளாதார அபிவிருத்தி அமைச்சர் பஷில் ராஜபக்ஷ, நீர்ப்பாசன முகாமைத்துவ அமைச்சர் நிமால் சிறிபால டி. சில்வா, நீதியமைச்சர் ரவூப் ஹக்கீம் மற்றும் முதலீட்டு ஊக்குவிப்பு பிரதியமைச்சர் பைசர் முஸ்தபா, சிறிலங்கா சுதந்திரக் கட்சியின் மட்டக்களப்பு மாவட்ட அமைப்பாளர் அருண் தம்பிமுத்து உள்ளிட்ட பலர் கலந்துகொண்டனர்.
தீர்வு குறித்த நிலைப்பாடு குறிப்பாக கடந்த பெப்ரவரி மாதம் தென்னாபிரிக்காவுக்கு விஜயம் மேற்கொண்டு அரசியல் தீர்வு மற்றும் நல்லிணக்க செயற்பாடுகள் குறித்து பேச்சுவார்த்தை நடத்திய அரச தரப்பு குழுவின் உறுப்பினர்கள் அனைவரும் நேற்றுமாலை சந்திப்பில் கலந்துகொண்டிருந்தனர். அரசியல் தீர்வு விவகாரம் தொடர்பில் அரசாங்கத்தின் நிலைப்பாடு என்ன என்பது இதன்போது தென்னாபிரிக்க குழுவினருக்கு அரச தரப்பு பிரதிநிதிகளினால் தெளிவாக விளக்கப்பட்டுள்ளது.
குறிப்பாக பாராளுமன்றத் தெரிவுக்குழு குறித்தும் இதன்போது கலந்துரையாடப்பட்டுள்ளது. நல்லிணக்க செயற்பாடுகள் மேலும் போருக்குப் பின்னரான நல்லிணக்க செயற்பாடுகள் தொடர்பாகவும் தென்னாபிரிக்காவில் முன்னெடுக்கப்பட்ட உண்மையை கண்டறியும் ஆணைக்குழு தொடர்பாகவும் விரிவான பேச்சுக்கள் இந்த சந்திப்பின்போது இடம்பெற்றுள்ளது.
ஜனாதிபதியின் இரவு விருந்துபசாரம் நேற்றுப் பகல் 12.30 மணியளவில் தென்னாபிரிக்க பிரதிநிதிகள் கொழும்பு கட்டுநாயக்க விமான நிலையத்தை வந்தடைந்தனர். அதனயைடுத்து அரச தரப்புடனான சந்திப்பை முடித்த பின்னர் ஜனாதிபதி மஹிந்த ராஜபக்ஷவின் தென்னாபிரிக்க பிரதிநிதிகளுக்கான இரவு விருந்துபசாரம் இடம்பெற்றது. இதன்போது ஜனாதிபதி மஹிந்த ராஜபக்ஷவுக்கும் சிரில் ரமபோஷா தலைமையிலான தென்னாபிரிக்க குழுவினருக்கு இடையிலான சந்திப்பும் நடைபெற்றது.
இந்த சந்திப்பில் அரசாங்கத்தின் அமைச்சர்கள் குழுவினரும் கலந்துகொண்டனர். இதன்போதும் அரசியல் தீர்வு மற்றும் நல்லிணக்க செயற்பாடுகள் தொடர்பில் விரிவாக ஆராயப்பட்டுள்ளது. கூட்டமைப்புடன் இன்று சந்திப்பு இது இவ்வாறு இருக்க இன்று காலை சிரில் ரமபோஷா தலைமையிலான தென்னாபிரிக்க பிரதிநிதிகளுக்கும் இரா. சம்பந்தன் தலைமையிலான தமிழ்த் தேசியக் கூட்டமைப்பின் பிரதிநிதிகளுக்குமான சந்திப்பு இடம்பெறவுள்ளது.
தேசிய பிரச்சினைக்கு தீர்வு காண்பதற்காக நியமிக்கப்பட்டுள்ள பாராளுமன்றத் தெரிவுக்குழுவில் கூட்டமைப்பு பங்கேற்காமல் இருப்பதற்கான காரணம் மற்றும் அரசாங்கத்துடன் நடத்தப்பட்ட இருதரப்பு பேச்சுவார்த்தைகளின்போது இணக்கப்பாட்டுக்கு வந்த விடயங்கள் உள்ளிட்ட பல்வேறு விவகாரங்கள் குறித்து இந்த சந்திப்பின்போது கலந்துரையாடப்படவுள்ளது.
கூட்டமைப்பின் நிலைப்பாடு அறிவிக்கப்படும் இரா. சம்மந்தன் தலைமையிலான தமிழ்த் தேசியக் கூட்டமைப்பின் பிரதிநிதிகள் ஏற்கனவே டந்த பெப்ரவரி மாதம் தென்னாபிரிக்காவுக்கு விஜயம் ஒன்றை மேற்கொண்டு ரமபோஷாவுடன் கலந்துரையாடல்களை நடத்தியிருந்தனர். அந்தவகையில் அந்தப் பேச்சுக்களின் தொடர்ச்சியாகவே நாளைய பேச்சுக்கள் அமையும் எனவும் தெரிவிக்கப்படுகின்றது.
அதாவது பேச்சுக்கான பேச்சுக்கள் என்ற விடயத்துக்கு ரமபோஷாவின் விஜயத்தின்போது முக்கியத்துவம் அளிக்கப்படும் என்று தெரிவிக்கப்படுகின்றது. யாழ்ப்பாணம் விஜயம் கூட்டமைப்பின் பிரதிநிதிகளுடனான சந்திப்பையடுத்து இன்று காலை யாழ்ப்பாணத்துக்கு செல்லவுள்ள ரமபோஷா குழுவினர் அங்கு வட மாகாண முதலமைச்சர் சி.வி. விக்னேஸ்வரனை சந்தித்து வடமாகாண நிலைமைகள் குறித்து ஆராயவுள்ளனர்.
அத்துடன் வட மாகாண ஆளுநர் சந்திரசிறியையும் சந்தித்துப் பேச்சு நடத்தவுள்ளனர். மாலை நாடு திரும்புகின்றனர் அதன் பின்னர் மீண்டும் மாலை கொழும்பு திரும்புவுள்ள தென்னாபிரிக்க விசேட பிரதிநிதிகள் இன்றைய தினமே நாடு திரும்பவுள்ளனர். சிரில் ரமபோஷா தென்னாபிரிக்காவின் பதில் ஜனாதிபதியாக இருப்பதனால் அந்நாட்டின் இவ்வார அமைச்சரவைக் கூட்டத்துக்கு தலைமை தாங்கவேண்டியுள்ளதாலேயே அவர் அவசரமாக நாடு திரும்புவதாக தெரிவிக்கப்படுகின்றது.
கூட்டணிக் கட்சிகள் எதிர்ப்பு இது இவ்வாறு இருக்க ஆளும் கூட்டணியில் அங்கம் வகிக்கும் அமைச்சர் விமல் வீரவங்ச தலைமையிலான தேசிய சுதந்திர முன்னணியும் ஜாதிக ஹெல உறுமயவும் சிரில் ரமபோஷாவின் விஜயத்துக்கு எதிர்ப்பு தெரிவித்துள்ளன. இவ்வாறான கடும் எதிர்ப்புக்கு மத்தியிலேயே சிரில் ரமபோஷா தலைமையிலான தென்னாபிரிக்க குழுவினரின் விஜயம் இடம்பெற்றுள்ளமை குறிப்பிடத்தக்கது.
ஐ.தே.க. வுடன் சந்திப்பு இல்லை இதேவேளை பிரதான எதிர்க்கட்சியான ஐக்கிய தேசிய கட்சியின் பிரதிநிதிகளுடன் சிரில் ரமபோஷா தலைமையிலான குழுவினர் சந்திப்பை நடத்தவுள்ளதாக ஆரம்பத்தில் கூறப்பட்டாலும் தற்போது ஐக்கிய தேசியக் கட்சி ரமபோஷாவை தனிப்பட்ட ரீதியில் சந்திக்காது என்றே தெரிவிக்கப்படுகின்றது. தமது கட்சிக்கு இது தொடர்பில் எவ்விதமான அழைப்பும் விடுக்கப்படவில்லை என்று கட்சியின் முக்கியஸ்தர்கள் தெரிவித்துள்ளனர்.
இந்திய விஜயம் ரத்து ?
இதேவேளை சிறில் ரமபோஷா, இலங்கை விஜயத்தின் பின்னர் இந்தியாவுக்கு சென்று அந்நாட்டின் ஆட்சியாளர்களை சந்திக்க தீர்மானித்திருந்த போதிலும் அந்த தீர்மானம் அவசரமாக மாற்றப்படடுள்ளதாக தெரிவிக்கப்பட்டுள்ளது. அந்தவகையில் ரமபோஷா தலைமையிலான குழுவினர் இந்தியாவுக்கு விஜயம் செய்வதில்லை என தீர்மானித்துள்ளனர்.
.jpg)
